Eguraldia dela eta Surfa bertan behera

Egun hauetarako eguraldi oso nahasia ematen dute eta itsasoan olatu oso handiak espero dira. Hau dela eta, Euskalmetek abisu horia iragarri du kostalderako. Beraz, egoera ikusita, Surfeko hastapeneko saio bat egitea arriskutsua dela uste dugu eta jardunaldia bertan behera uztea erabaki dugu. Saiatuko gara udaberrian berreskuratzen.

Mila esker

Asteburuko jardunaldia: Azaroak 5

Asteburu honetan jardunaldia dugu berriz ere eskola kirolean. LH3 eta LH4koek errugbia izango dute. LH5 eta LH6koek krosa izango dute Aian. Bestalde, denboraldi hasieran, surfa eta arrauneko jardunaldi bat atzeratu beharra izan genuen antolatzaileek jardunaldia aurrera eraman ezin zutelako eta asteburu honetan aukera emango da kirol horiek probatzeko. Aurten, azken orduan izan diren aldaketak medio, LH6koek surfik ez dute izango eta LH5koek arrauna ez dute izango. Baina atzeratu zen jardunaldi hori berreskuratzeko aukera izango da eta ordutegiak aukera ematen dioten taldeek atzeratutako jardunaldia eta krosa biak egin ahal izango ditu, hala nahi badute.

Asteburuko jardunaldia: Urriak 22

Asteburu honetan ere kirol ezberdinak izango ditugu gure gaztetxoentzat. Benjaminek, judo eta irristaketa izango dituzte eta alebinek, surfa (txapelketa dagoelako atzeratu egin da beraz ez duzue surfeko ordutegirik ikusiko jardunaldia), arrauna eta atletismoa. Hona hemen jardunaldia:

AUTOBUSAK
Oriora joatea tokatzen zaizuenoi, autobusa izango da zuen txanda hasi baino 15 minutu lehenago: alegia 8:45, 9:45, 10:45, 11:45. Bonberotako rotonda eta Aguexeko rotonda izango dira geltokiak eta ekintza egin ondoren ere ekarriko zaituztete. Guraso batek joan beharko du taldearen arduradun gisa autobusean.

Asteburuko jardunaldia: Urriak 15

Asteburu honetan LH3 eta LH4ko benjaminek jai izango dute eta LH5 eta LH6koek surfa, arrauna eta atletismo. Gogoratu, surferako, zuen trajeak eraman ahal badituzue hobeto, bestela bertan utziko dizkizuete. Surf taulak bertan utziko dizkizuete, ikasteko, kortxozkoak erabiltzen dituztelako. Atletismo itxasmendin izaten da. Arrauna “Zarautz” jartzen badizuete, Orion dagoen Zarauzko Arraun Elkartearen egoitzan egingo duzue, “Getaria” jartzen baldin badu, Getariako Arraun Elkartearen egoitzan.

Datorren astelehen eta asteartean, entrenatzaileen formazioa egingo dugu. Aste honetan egitekoak ginen baina atzeratu egin behar izan dugu formatzailea gaixorik zegoelako. Formazio horren ostean hasiko gara pixkanaka taldeen entrenamenduak martxan jartzen.

Asteburuko jardunaldia: Urriak 8

Asteburu honetan Benjaminek (LH3-LH4) errugbiko jardunaldia izango dute. Alebinek (LH5-LH6) surfa, atletismoa eta arrauna izango dute. Atletismoa itxasmendin izango da. Surfa Zarauzko Surf Elkartearen lokalean (Argiñano jatetxearen azpian), bere trajea eta taula dituenak eramatea komeni, besteentzat bertan izango da. Asteburu honetan oso marea baxua tokatzen denez, arrauneko jardunaldia ezin izan dugu nahi bezala osatu, beraz, talde batzuek ezingo dute arrauna egin eta urriaren 29ra atzeratzen zaie. 
Gozatu eta ondo pasa!

Entrenamenduak

Entrenamenduekin noiz hasiko garen galdetzen ari zarete guraso batzuk. Entrenatzaileen formazioa, taldeen banaketa eta entrenamenduen tokiak antolatu eta kudeatzen ari gara. Asmoa, datorren astean entrenatzaileen formazioa egin eta Urriaren 17ko astean entrenamenduei ekitea da. Dena prest izandakoan informatuko zaituztegu talde bakoitzak noiz eta non ekingo dion entrenamenduei. Txikienei ikastolako espazio bat eskaintzea da asmoa, desplazamenduak errazteko, eta alebinei ikastolatik kanpoko espazio bat egokitzen saiatuko gara.

Mila esker

Urriak 1: Jardunaldia

Aste honetan hasiera emango diote Eskola kirolari LH3 eta LH4ko benjaminek. Irristaketa eta Judoa izango dituzte. Irristaketa Orokietako frontoian izango da. Norberak eraman behar ditu patinak, kaskoa eta babesgailuak. Noski, inguruan ditugun lagunek patinik ez badute, txandatuz moldatu ahal gara. Judoa Lizardi institutoan izango da, araba kalean.

LH5 eta LH6ko alebinek aldiz errugbia pasa den astean bezala.