Eskola kirola bertan behera Urtarrilak 28ra arte.

Eusko jaurlaritzak eskola kirola bertan behera utzi ditu urtarrilaren 28a bitartean. Hilaren bukaeran dagoen egoeraren arabera erabakiko dute murrizketa hau luzatu edo ez.

Entrenamenduak, bizikidetza taldeetan egiten ditugunez, aurrera jarraitzen dute.

Uste baino ikasturte gogorragoa tokatzen ari zaigun honetan, animo denei eta besarkada bana.

Jardunaldia: Azaroak 20

Hemen duzue asteburuko jardunaldia. Lehenik eta behin, zorionak eman nahi dizkizuegu parte hartzaile, entrenatzaile eta gurasoei. Aurreko asteburuan oso ondo joan zen hondartzako futboleko jardunaldia. Guraso eta jardunaldiaren bueltan ibili ziren antolatzaile, epaile eta hainbat ikuslek idatzi digute talde mixtoetan zegoen giro ona azpimarratuz, ikasleek denek parte hartzeko izan zuten jarreraz… beraz, ZORIONAK denoi eta jarrai dezagun bide horretan.

  • Asteburu honetan eguraldiak hotza, haizetsua eta euritsua ematen dute guztiz. Beraz, mesedez, erropa eraman kirola egitean ez hozteko eta aldatzeko ere. Ahalik eta partidu gehienak eremu estalietan jartzen saiatu gara. Orion jolastea tokatzen zaizuenoi zuen artean antolatu kotxeetan taldea eta entrenatzaileak eramateko.
  • Antonianotan jokatzen duzuenok, soilik guraso arduradun, parte hartzaile eta entrenatzaileak sartu ahalko dira. Ikusleak ezingo dira sartu Covid-19aren inguruko protokoloak direla eta.
  • Jarrai dezagun taldeetan umorea jartzen eta partaide guztiei parte hartzen laguntzen eta babesten.

Azaroak 20ko jardunaldia

Hondartzako futbol jardunaldiari ekingo diogu asteburuan:

  • Kamisetarik ez duzuenok, berriak iritsi bitartean, edozein kamiseta zuri edo berderekin moldatu ahal duzue. (ikastola – ikastola partiduetara biak eraman edo aurrez adostu kolorea aurkariekin. Beste edozein eskolaren kontra berdea)
  • Alebinetan zenbakiak eskuan idatzita edo buruz jakinda nahiko.
  • Covid 19aren jarraipena errazteko, partidura etorri direnen zerrenda epaileari pasa behar diozue talde guztiek eta kopia bat zuek gorde.
  • Lehen txandakoek porteriak jarri egin behar dituzue eta bigarren txandakoek kendu.
  • Denok ondo pasatzeko, lagundu taldekide eta aurkariei. Moldatu ingurukoen mailara eta denei lagundu parte hartzen eta gozatzen.

Orientazio jardunaldia ZARAUTZEN

Datorren igandean, azaroaren 21ean, orientazio proba bat ezagutzeko eta parte hartzeko aukera aparta izango dute zarauzko eta inguruko herrietako haur, gazte eta familiek.

Izen-ematea irekita dago jada eta azaroaren 18an, 22:00etan itxiko da (kopuru maximora iritsiz gero lehenago itxiko da).

Aurreko urtean ekin genion Gorputz Hezkuntzako saioetan ere Orientazioa lantzeari. Haurren garapenean oso garrantzitsuak diren hainbat gaitasun lantzen dira kirol honetan eta etxeko guztiak elkarrekin egin ahal dugun jarduera da. Kirol Komisiotik animatu nahi zaituztegu parte hartzera. Ez zarete damutuko!

Informazio guztia hemen: https://gotorientazioa.org/2021-zarautz-2/

Azaroak 13ko jardunaldia

Asteburu honetan, Benjaminek errugbia, judo eta irristaketa izango dute. Alebinetan, arrauna egin gabe geratu ziren taldeek izango dute arrauneko jardunaldia (ordutegiak zehazten gabiltza) eta gainontzekoek atsedena izango dute. Guraso asko ari zarete asteburu honetan saskibaloia tokatzen ote den galdezka. Zuen artean darabilzuen egutegia ez dugu guk banatu eta akatsak dituen egutegi zirriborro bat da, beraz, mesedez, kontuz nahasketekin. Egutegia itxi nahian gabiltza oraindik eta horregatik ez dugu ezer zabaldu.

Bestalde, zuen zalantzak argitu eta eskola kirolaren inguruko kontuak azaltzeko Eskola Kirolaren GIDA osatu dugu eta ezkerreko menuan eskuragarri duzue.

Zer pentsatu eman digun albistea

Guraso batek bidali digu albiste honen berri (eskerrik asko bihotzez).

Zer pentsatu handia eman digun albistea da eta eskola kirolean ditugun jarreren inguruan hausnartzeko balioko duelakoan zuei helarazten dizuegu. Denon ahalegina beharrezkoa izango delako gure eskola kirolean hain presente dauden jarrera desegokiak behingoz desagertarazteko.